人稱肥馬嘅商務及經濟發展局前局長馬時亨（圖），日前應一個化妝品牌子影相作慈善活動，為奧比斯籌款。作為港大舊生，肥馬被問到佢眼中最珍貴、最想守護啲乜嘢時，就以港大校委會最近開會有學生衝入會場一事為例，話最想守護港人向來嘅尊重同互諒精神，覺得學生如果見到不平事，絕對應發聲，但衝入議會就係唔尊重人，甚至建議港大考慮成立紀律委員會處理事件㖭。
查實明年初就接任港鐵主席嘅肥馬，面對高鐵超支嚴重，之後都可能會被各界挑機，佢又點應對呢啲問題呢？佢話做足心理準備，會抱住尊重嘅精神面對。咁佢到底係咪會去跑馬仔？肥馬即刻耍手擰頭，仲由以前自稱「三無」、即係無意、無計劃、無打算，加多個「無心」變成「四無」。唔知無心係咪等於無意呢？