8月1日本欄寫「追數」，提及追數K，想唔到之後竟有四位讀者來郵來電，要求介紹追數K同佢地傾吓。左丁山問來電之老友讀者：「有乜事要搵到追數K呀？」佢不願多談，只係話今日不時有好多人拖數，收數困難。左丁山通知追數K有此等事情，追數K話自己幫老友追數，純屬友情，只偶一為之，做呢行要好專注咁話，恕難接觸讀者咯。
又有一位讀者心急人來郵問：「美國加息後，樓市回落10%-20%的機會大不大。如俾到50%首期，現時入市的風險高不高？」
美國加息，盛傳在9月，但因為美國經濟數據唔係太強，似好非好，失業率雖跌，但工資增長緩慢，令美國所有中產階級及基層不滿，故此聯儲局亦有理由延遲加息，到十二月先至加息，一啲都唔奇。即使9月加息，加幅頂多係25點子（0.25%），香港當然亦會同步跟隨，曾俊華恨咗好耐嘅嘞。以目前本港一般供樓利率大約係2厘至2.25厘計，如以2.25厘做按揭，五成首期，供四百萬元，供二十年，每月供款20712元，加到2.5%，月供21196元，最低每月收入要求係四萬六千元以下。照計就影響不大。
加息後，必有一連串加幅，唔會咁快就停，故此當然會影響香港樓價向下調整，或無上升動力，但如果話跌10%至20%，就好似嚇人一啲，目前睇唔到有咁大威脅。不可不知嘅係，2016年係美國大選年，民主黨與共和黨競爭會好激烈，民主黨準候選人希拉利．克林頓雖然民望領先，但有兩個包袱：（一）年紀已大，就任時70歲，（二）老公係克林頓，美國人未必鍾意老公做完，老婆又做總統。共和黨如有新鮮年輕人出到閘挑戰希拉利，呢位女士未必贏梗。聯儲局雖然話係好獨立，但逢總統選舉年，過往聯儲局主席都幾識做，唔輕易加息，以免累親白宮主人翁嘅政黨，耶倫會唔會俾面希拉利，拖住加息幅度，以便締造美國歷史，選出一位女總統，不讓南韓、台灣專美呀？有咁嘅可能性。
美國加息，亦不能太過自我中心，總要慮及世界經濟，當他國不加息，美國加息，美元必然漲完又漲，令美國跨國公司盈利大受打擊，拖低股市，令聯儲局有所顧忌。對本港樓市最大嘅衝擊未必係加息，而係失業率，如果香港失業率升到美國水平（5%以上），樓市真係有可能跌10%至20%！