長實（1113）樓神趙國雄堪稱打工皇帝，估唔到佢都有抽iBond，仲扁晒嘴，點解呢？趙國雄以主席身份出席泓富產業信託（808）業績會，講完正經嘢就放鬆晒，問到人仔貶值、股市又波動，無風險嘅iBond係咪好嘅投資呢？
點知趙國雄突然慘叫一聲，「抽得一手咋，想請你哋（記者）食飯都唔得」。佢話係私銀嘅人幫佢安排，平時IPO人哋幫趙國雄不少，所以今次禮尚往來，幫吓人手囉。
題外話，私銀嘅人居然諗到去幫上市公司主席抽iBond，真係好想知係邊間囉。
睇番舊年年報，樓神一年賺3,000萬，不過講到iBond，原來都同小市民一樣，行使公民權利年年抽iBond。樓神話佢會揸到maturity，唔會而家沽。
其實樓神你抽iBond咪當體驗平民百姓生活囉，區區幾百蚊都唔志在喇！