香港觀鳥會聯同國際鳥盟同香港海洋公園保育基金宣佈，聯手保護世界上最稀有嘅中華鳳頭燕鷗，令呢種被國際自然保護聯盟列為瀕危物種紅色名錄、世界上最瀕危嘅海鳥再次破紀錄繁殖重現生機。
香港觀鳥會話，目前只有中國浙江韭山列島、五峙山列島及台灣馬祖有中華鳳頭燕鷗出沒繁殖嘅紀錄；過去全球估計只有少於100隻、去年更估計只有不足50隻。香港國際鳥盟亞洲部主任研究員陳承彥有參與呢次中華鳳頭燕鷗嘅保育計劃，今年5月至8月上旬，喺韭山列島嘅孤島鐵墩島安裝400隻中華鳳頭燕鷗嘅假鳥模型，並安裝2至3部揚聲器，播放佢哋嘅鳥聲，令中華鳳頭燕鷗安心繁殖，結果成功招引52隻中華鳳頭燕鷗當中嘅25對喺島上繁殖。