體育用品股李寧（2331）早前同小米合作，推出智能跑鞋。公司主席李寧講，產品非常受歡迎，一個月左右已經賣出5萬對。
公司食髓知味，下星期將再推出智能籃球鞋，取名「小強」，唔知係唔係喻意公司咁多年都「打不死」。
上次同小米合作，公司兩款跑鞋分別叫「烈駿」同「赤兔」；今次李寧自家研發嘅智能波鞋叫「小強」，華華問李寧知唔知「小強」響香港係乜意思，李寧笑笑話「我當然知道，可能比你還要早就知道」，佢又話今次款智能波鞋，香港消費者都可以上網買到，但就賣關子唔肯講幾錢。
自從前行政總裁（CEO）金珍君離任後，李寧一直兼任主席同CEO，佢噚日主動提起，公司繼續搵合適人選做CEO，但自己「全力參與」業務，又話搵新CEO唔係最緊急嘅事，睇嚟好唔捨得自己一手湊大嘅公司。