天津大爆炸場面驚人，蘑菇雲連衞星圖都睇到。有媒體揭露，方圓3公里內有將近10個屋苑存在，其中最近的萬科海港城屋苑，距離爆炸現場只有600米。筆者當然希望啲居民可以吉人天相，逃過一劫。但就算人冇事，單位都將成為危樓，非常淒涼。
有網民質疑，點解爆炸品倉庫可以同大型屋苑相距咁近？翻查紀錄，肇事公司2011年成立，只可以處理普通貨物，當時萬科樓盤已經起咗。但到2014年，公司倉庫突然攞到牌，可以處理危險物品。公司申請牌照時，做咗環境評估報告，聲稱已向附近居民做咗問卷調查，獲得所有受訪者都同意。但而家內地媒體問番居民，所有人都話，冇聽過呢個問卷調查，擺到明係假諮詢。
萬科董事長王石發微博話，已經派咗緊急小組去天津，幫番啲業主，為業主祈福。萬科係中國最大房企，身為龍頭，都可以喺所有居民唔知情情況下，俾人靜雞雞喺身邊起一個威力無比的火藥庫！買內地樓牙煙程度，真係超乎想像。
黃尹華