本來以為做到頭條……估唔到中段殺出四哥怒摑曾江，當中恩怨是真是宣傳真係不得而知，只知明明係城中焦點嘅佢———李逸朗，本來因為Mandy嘅fb post成為全城熱話，做梗C1——本來係，但因為四個小生，好快已經被遺忘。
李生前日受訪時，將佢幫《100毛》拍嗰條Don兵抽水片嘅責任擺晒落去《100毛》度，話係人家俾晒稿佢讀，又指事件鬧大，係因為「大家喺後面，不停地你一句我一句你一句我一句」。總之千錯萬錯唔係Don錯。
昨日凌晨時份，Don，曾話過已經冇嘢再講嘅佢，再次出po。佢話:「請大家别再對罵了，無論在我還是Mandy的page，這不是我想要的結果⋯⋯由於事件越放越大，某些媒體的報導已經越來越誇張失實，甚至連我當時人也摸不清頭腦，到底報導在說什麼⋯⋯？
「一張合照，本意是希望集體回憶而已，沒有多重意思，一篇散文，在合照前一個晚上為記錄跟Eddie@EO2的一頓晚餐有感悟而寫的，兩者本無關聯。而我，也早澄清說過不下數十次，我跟Mandy由始至終就是拍檔。
「我希望大家要繼續支持Mandy，因為她很努力才有今天的成就，藝人轉型沒大家想的那樣容易。如果我跟100毛的合作為她和家人帶來困擾，我深感抱歉。而我，大家要不要繼續支持也可以，因為⋯⋯我是傻女，無論支不支持我也會按自己想要的方法活下去。
「請各位媒體朋友别再為這件事打電話給我作採訪，因為我不會再回應更多了，多謝。」之前Mandy都有出po話解釋完一次之後不再回應，之後真係冇再回應——除咗喺佢自己個fb po回應網民之外，都只係簡單幾句話主要向老公(品客先生)交代之餘，品客先生亦有現身撐老婆，仲話:「交托給我」，嗚哇！
其實Mandy真係好細心，佢知道有fans去咗Don個fb page痛斥Don抽水，於是好言相勸，叫佢哋自己刪番嗰啲留言，但有好多人不知就裡，以為Don河蟹鬧佢嘅留言，亦有人喺Don嗰度留言，批評Mandy刪除留言。