求驗客手記：雲祖柏「四哥上身」聰仔表同情

哥斯達黎加主帥雲祖柏，周二因為喺一場U23賽事中「四哥上身」，同場地保安發生爭執，繼而動武，周三隨即宣佈辭職。身為前哥斯達黎加小國腳嘅南區教練鄭兆聰，對於老友辭職都深表同情︰「作為國家隊教練，出手當然唔啱。早前墨西哥教頭米基爾靴里拉發生類似事件，最後都係辭職收場，所以中北美洲嘅足協畀咗好多壓力哥斯達黎加足總，加上雲祖柏接任哥軍後成績一般，唔係太受球迷支持，而佢亦有一對年幼仔女，傳媒都畀咗好多壓力佢家人，所以佢今次選擇咗辭職。」

料由副手教哥國

至於新任哥國教練，聰仔話雲祖柏副手奧斯卡拉美利斯好大機會接任，曾經同佢喺當地班霸球隊阿拉祖蘭斯做過隊友嘅聰仔，話呢位熱門人選經驗豐富，絕對有能力帶國家隊。