政府噚日公佈政治委任官員及行會成員利益申報更新資料，外界嘅焦點，梗係兩位新任局長、即係民政事務局局長劉江華以及公務員事務局局長張雲正，係咪身家豐厚禾稈冚珍珠？點知兩位新局長竟然同樣冇以自己、配偶或公司名義，喺香港或本港以外地區擁有土地或物業，唔通樓市癲價到咁，月薪卅萬嘅局長都買唔起樓？抑或佢哋唔想做樓奴，想生活free啲呢？
楊偉雄阿瑟王身家豐厚
翻查申報日期可見，佢哋獲委任當日、即係上月21日填寫表格，兩人除咗冇樓又冇地，同時申報冇擔任公共或私營公司受薪董事職位，但劉江華就留任民建聯贊助會員、佢有份創立嘅公民力量會員、以及賽馬會賽馬會員等，佢申報太太穆斐文、即廉署前社區關係處處長「退休前休假」。張雲正則申報擔任基本法推廣督導委員會官方委員、佢亦係賽馬會全費會員，53歲嘅佢報稱冇配偶。
雖則呢兩位新貴「兩袖清風」，但有錢嘅梁班子亦大有人在。好似今年3月初獲委任為行政長官創新及科技顧問、行會成員嘅楊偉雄，八方早前已經講過係身家豐厚，佢同太太喺香港同海外合共持有10個物業出租或自住。但稱王嘅依然係「阿瑟王」李國章。行會成員李國章喺香港同英國倫敦，同往年一樣以公司名義持有32個物業、8個車位，繼續蟬聯樓王，另一行會成員林健鋒亦喺有成13個物業同15個車位，亦有1幢12層工廈，喺內地有6幅地。
問責官員中則以勞工及福利局局長張建宗最多物業，喺香港有9個物業、1個車位：8個物業由妻子擁有，1個作家庭成員居住、其餘出租。政務司司長林鄭月娥嘅最新申報則冇咗英國劍橋及劍橋郡嘅物業，剩番由老公持有、喺廣東中山1個自用單位同車位。
李八方
mailto:[email protected]