歐洲足協（UEFA）公佈上季最佳球員嘅最後三強，我求大俠睇個勢又係基斯坦奴朗拿度（C朗）同美斯之爭，至於蘇亞雷斯就明顯係嚟陪跑㗎啦！對住C朗、美斯呢啲人氣王，求其拍個底褲廣告都勁吸客，個「底」花晒嘅阿蘇又點夠爭吖！
兩大球王受廣告商歡迎
係人都知上季歐洲足協最佳球員呢個獎，唔係C朗就係美斯拎，阿蘇只係叫做贏咗尼馬、保方同夏薩特，有幸入到三強。歐洲足協會喺27號嘅歐聯抽籤儀式上，公佈埋最後得獎者。
計數據，阿蘇嘅入波量被拋離幾條街；計榮譽，你阿蘇有嘅，美斯都有，美斯仲係球隊靈魂同核心，點睇阿蘇都係無望；講場外，阿蘇有咬人前科，冇咁受廣告商歡迎。相反，C朗同美斯都拍過底褲廣告，美斯係幫D&G拍，而C朗就索性肥水不流別人田，幫人哋影得多，倒不如出埋自家底褲品牌搵真銀。
C朗太勁「執細」下身
睇番C朗同美斯上季嘅表現，就肯定揀美斯攞獎，因為美斯幫巴塞喺西甲、西盃同歐聯三大戰線都贏晒皇馬。雖然係咁，但喺C朗心目中，佢覺得最好嘅球員都係佢自己。C朗話：「我相信喺我嘅行業入面，我係最佳，我一直都為咗咁而努力。喺我腦入面，我一直相信自己係最好嘅。就算喺遊戲入面，我都覺自己係最勁！」C朗揀咗自己做第一，邊個係第二呢？真係幾估唔到，原來係前皇馬隊友迪馬利亞，第三位係前輩費高，第四位就係施丹，而美斯都有第五位。
雖然C朗咁講係自大咗啲，但西班牙傳媒都認同C朗嘅身形冇得彈！西媒將C朗啲內褲廣告同原相比較，發現啲相基本上冇執過，因為C朗啲肌肉線條本身都好完美！甚至，執相位仁兄覺得C朗啲肌肉太強壯同埋太大鵰，要幫佢執到平凡少少，唔使咁突出。