港大噚日宣佈會喺9月15日舉行名譽大學院士頒授典禮，向6位人士頒授名譽大學院士銜。1972年畢業於港大法律學院，屬首批本地培育法學本科生嘅校友、資深大律師陳景生榜上有名，港大讚揚佢積極參與公共事務，對推動法律教育不遺餘力，而陳景生最近亦有份聯署質疑港大校委會拖延陳文敏嘅副校任命。八方最想知道呢位「風水大狀」，會唔會打上鍾情嘅紅色呔出席典禮？
現為信德集團有限公司董事總經理「賭后」何超瓊亦有份，港大話Pansy致力喺港、澳及內地推動旅遊經濟，推廣文化藝術，亦積極協助婦女同青年教育培訓。獲港大讚揚熱心公益事務嘅家庭醫學專科醫生李國棟亦上榜，佢係港大副校監李國寶嘅堂弟。餘下3人為夏利里拉酒店有限公司董事主席夏雅朗、太子珠寶鐘錶公司主席鄧鉅明同教育工作者謝錫恩。