人民銀行突然喺星期二將人民幣貶價，呢個消息除咗殺一個措手不及之外，人行今次突然嘅舉動，背後用意亦成為市場焦點，有講法係為入SDR鋪路，但呢個講法又解釋唔到點解佢要咁突然。
觀乎呢幾日市場反應，似乎較傾向相信呢個係救經濟嘅招數之一，點解？因為大家都覺得2%唔足以救經濟，所以連日急挫，跌到市場覺得夠為止。結果令到人行噚日開個緊急發佈會，大呼「我們不需要調整滙率來促進出口。」
事實上，將貨幣貶值來刺激經濟，成效一直都備受質疑，近年將貨幣貶值工作不遺餘力的日本，日圓兌港元滙價較去年跌一成幾，結果？出口的確有提升，但進口商品及汽油價格上升，普通市民開支卻不斷上升。
但中國製造與日本製造有別，日圓滙價跌，消費者確實會覺得日貨平咗，人民幣跌，消費者未必會覺得國貨平咗，因為佢哋更關注質素有冇好咗。至於油價，內地本身就有定價機制，國際油價只係其中一個因素。
過去一段時間，大陸人愛外遊，尤其是其他亞洲地區，主要由於人民幣滙價相對偏強，今次貶值，雖然三日幅度只有5%，但普羅大眾對價格最敏感，相信外遊人數會下跌，至於係唔係可以促進內需？其實大陸人同外國人一樣，都注重質素嘅！
流氓