【專題籽：人言無畏】
于燕平，穿着短袖白恤衫，手撥金色紙扇，頭殼與身材都圓圓的。2000年他因超時冇補水，跟前特首曾蔭權對簿公堂，2012年首次以「特手廚神」之名開《笑足全場》棟篤笑，又寫了成本書鏟爆曾蔭權刻薄史，私人宴席上李嘉誠、何鴻燊、小甜甜、陳振聰的秘聞他要講兩個月都講不完，卻從此絕迹香港高官廚房。
身為一條兩頭蛇，認識許多接近政府和黨派的兩頭蛇，大陸高官豪紳最愛捉他爆香港官賈豪紳秘史，他樂得繼續執鑊鏟聽是非，開騷講棟篤笑。他的Gag，有時爛爛哋；他的廣東話，聽到耳仔側側哋；但講大陸「國情」跟香港現況就有血有肉。他曾在光明頂跟陶傑說：「你哋香港人都唔知乜嘢係共產黨，點鬥？」陶傑答：「係啦！梁振英都唔知乜嘢係共產黨，得你知之嘛！」講到尾，他還是愛香港的自由空氣：「佢哋（高官及中間人）講嘢真真假假，你要分析，用腦睇。」本月他在藝術中心壽臣劇院再來兩場棟篤笑，再揭高官瘡疤及名人暗事。
「我想將真相話俾大家聽，香港搞到今時今日咁，邊個要負責，要點走出困境。 」他89年來港，半鹹淡廣東話講得急，有時被自己的爛Gag逗得喘不過氣，「我喺大陸係個好儍嘅儍仔，來到香港視野開闊。我所有東南亞菜、壽司、煎炒煮炸都喺香港學。我好想講番俾香港人知，令香港人開心啲。」早前有個國際評級指香港人最不懂笑。他記憶中89年的港人好和善常愛笑，今日電視裏的人扭頭扭髻不知笑甚麼，觀眾還是一嚿木。節目水平每下愈況固之然，重要是大家都被巨石壓心頭。
阿爸撐腰不怕得罪人
2004年起他在大陸官場搵食，辦過幾場諷刺時弊的棟篤笑，說：「大陸沒人敢講這些，相聲都只敢講閒事，層次較低。」不怕得罪人？他突破盲點，以「我爸是李剛」的姿態答：「我爺是南京政府國民黨高官；我爸是資本家，拜上海杜月笙做老頭子。一班高官會幫我的稿把脈，才公開講。」唓！自我審查，還棟甚麼篤笑？「香港有個連《辭海》都沒有、但很好的詞：『執生』。」他說全世界沒一個政黨可以萬歲，就給人大代表投訴了。但他「兜番」說這話是毛主席說的，沒事；如何把貪官抓乾淨，他說從八千萬共產黨黨員中，槍斃掉四千萬個就行了，全場譁然：「但我未上台就被車撞死了。」又過骨，「總之別讓人抓住話柄， 你唔會執生實死得啦！」
大陸的高官愛邀他講香港富豪的是非，要聽「除晒衫」嗰隻：「着西裝人模人樣時甚麼都是假的；回家剝晒衫褲先係真。」據他的「是非針」說，梁振英其實想辭退林鄭月娥與曾俊華，但中央不同意，「中央絕對不相信他（梁振英），所以找二人騎着他。如果他炒了（林鄭和曾）兩個，他可以無法無天喎！」習近平找機會跟曾俊華握手，畫面如當日董建華、曾蔭權握手加冕，但其實是握給梁振英看，示意：「你炒佢我咪炒你囉。」雞頭最終掉到曾德成跟鄧國威頭上。
他又指真心佩服肝移殖權威盧寵茂教授，當年他救了肥姐，今年首創結合二人的肝救人，是醫學泰斗：「但你唔識政治就唔好搞啦！連『插水』都唔識，那要技巧唔係亂咁插嘛！𠵱家衰咗咪俾人十二碼囉！」佢表情係真激氣。「如果你諗辦法將民主派及建制派，各捐半個肝移殖到特區政府上，能夠團結先做啦！冇政治智慧就咪做，政治好污糟呀。」
來生不做大陸狗
四月回港，嶺南大學剛搞了場粗口演唱會鬧警察，他勸學生，「如果是我罵『你老×，×你老×呀！』全世界都會原諒我，因我是沒文化『×街廚房佬』，但大學生社會精英怎可粗口鬧人？」學生紮行馬：「咁班警察做得唔好！」他又說自稱孔子後人的孔慶東教授曾用北方話罵他是狗。于燕平說：「教授你這話有誤差，其實香港人很喜歡養狗，對狗很好；若你在大陸混不開，來香港，大家會對你好好的。」曲到圓，旁人哄笑，谷到孔教授充血上腦，于燕平：「這樣罵才爽嘛。做狗都要去香港做啦！大陸有狗肉節呀！」又笑到扯蝦，面都紅晒。
朱經緯案警察打人冇罪，市民卻被告襲警，三個後生仔火滾，我打你唔得，我打你電話得唔得！結果三個人共打了67個電話被判罪，于燕平：「濕濕碎啦！當年曾蔭權搵人打電話騷擾我，唔俾我做生意，打了1,500多次呀！」結果人抓到了，警察說一般打40次電話已可鋤死他，但結果竟以證據不足不予起訴。當時的律政師是梁愛詩，師傅，明白了，他嘆：「有公平嗎？沒公平的。這些只能化為笑話，笑才是最好。」
只食進口米 戒雞多年
他認為國民教育是必須，但中央想搞的是國情教育，一味唱好，撐的反的，都不了解是怎麼一回事。回想他六歲學琵琶、八歲學二胡、十歲彈鋼琴，那年代是大富人家，但一場文化大革命：「廣東話就係『冚家×』。你唔好笑呀真係『冚家x』！抄家乜都冇，12歲起在社會飄泊。」李國章說學生堵路是文化大革命，于燕平即罵：「你知甚麼是文化大革命，學生如何受害？好多人死得好慘。」今日中國衞星火箭穿梭機升空，但食物衞生是零，高官們在酒店宴客會自備油與米，避開地溝油；大陸九成土地被農藥污染，他只吃進口米；戒雞多年，因雞飼料有一半是抗生素以避禽流感，醫院的朋友近年就收了許多大胸的三、四歲女孩病患；連香港的水都含鉛，基本都吃不好，才是更致命的冚家×。
《笑足全場》棟篤笑
日期：8月28-29日
時間：晚上8時15分
地點：香港藝術中心壽臣劇院
記者：陳慧敏
攝影：許先煜
編輯：李寶筠
美術：楊永昌