因為細佬曾德成突然「被辭職」，公開暗寸特首梁振英嘅立法會主席曾鈺成，噚日就同CY出席一個《基本法》圖片展，不過八方見到CY到場後，真係當阿曾透明，面對面都唔覺有打招呼。
咁個《基本法》圖片展又好唔好睇？雖然連阿曾都話唔明，點解個展覽有關基本法草委部份，獨欠前草委李柱銘資料，但CY對展覽好受落，致辭時多次狂讚搞呢個展覽嘅《文匯報》，話佢哋為說明《基本法》「初衷」提供根據。CY之後繼續擦鞋，話自己25年一直都帶住《文匯報》送畀佢，一本叫《基本法的誕生》嘅書，阿曾席間就主動問CY借嚟睇，佢話睇到本書有提李柱銘做過草委喎。