陳智思（Bernard）唔止要少鹽少糖，人幣貶值到咁，佢都應該要少人仔。
話說佢做老細間保險公司亞洲金融（662），因為人幣貶值賬面蝕咗幾球，而佢自己都有幾球人仔做緊定存，但係喺低位買入，長線投資擺喺度唔理等收息，佢覺得阿爺唔會畀人仔跌得太勁喎。
除咗人幣定存，近期股災唔知佢有冇損手？話說Bernard一直話自己係長線投資者，買啲全部都係big cap嘅大藍籌，例如滙控（005）同港交所（388），佢好強調港交所係低位買，所以都仲有賺，前日呢間嘢話可以股代息，佢諗住拎股票，睇嚟真係好睇好。
Bernard今年上半年用公司名義，開咗間針對50歲以上人士嘅健體中心「永健坊」，趁住中期業績佢都有啲update，話姪女陳曉鈴打理間餐廳收入唔錯，但「永健坊」成間嘢收入就未達標，要做多啲宣傳，3年應該可以breakeven。