忘記《神奇4俠》吧，港版神耆四俠先有睇頭，加埋過三百歲的活寶，在活動上演繹《玩轉腦朋友》真人版，謝賢、胡楓、曾江、Joe Junior各自扮演所屬「情緒專員」，成功為新節目《4個小生去旅行》造勢。杜秋棠嘗試案件重組，看看當時情緒專員在說甚麼。（以下是模擬情節，如有雷同，實屬巧合）
宣傳人員陸續散去，其時阿憎（曾江飾）、阿樂（胡楓飾）大啖蛋糕，未察覺阿燥（謝賢飾）怨氣累積，蓄勢待發。
阿燥指着阿憎：「有個跛嘅，唔緊要，X佢個老X，流鼻血流四個鐘，死X咗啦！」
阿憎：「未死得喎。」嘴藐藐的他還拋起黃色記憶球，一臉得戚。
阿燥：「我知你好X活躍！」
阿憎：「唔得。𠵱家仲趷吓趷吓。」
阿樂見火花四濺，借執碟緩和氣氛。阿驚（Joe Junior飾）其實好肚餓，但因要拿着一堆錄音咪，有得睇冇得食。
阿樂：「好食喎，食完下啖氣就算，好嘛？」
阿燥聽不進耳，突然頭頂冒煙，兜巴摑向阿憎，阿樂也被摑到眼鏡飛脫。
阿燥：「X你個老X，我噚日喺…喺…喺…」噢，友誼小島崩塌了。
阿憎：「咩話？我講過咩？」顯然未被氣場壓倒，把口仍不饒人。
阿樂釋出正能量，邊用身體隔開兩人，邊向記者示意OK：「衝動啫，做戲啫，宣傳啫，冇事嘅。」
阿驚則陷入驚恐，如稻草人般攤開雙手，但仍舊將錄音咪握得緊緊：「驚到唔敢郁，唔好打我。揸乜都唔知，拎住炸彈都繼續拎！」
此時，阿燥已完全失控，並演繹當日錄音時受辱經過。
阿燥：「喺錄音室已經想打你！」
阿憎：「哦，喺呢度就想打我。」
阿燥：「我邊度都打到你！」
阿樂：「哈哈哈，唔好咁，唔好咁。」
阿驚：「我淨係想食蛋糕。」
最後，阿燥奪門而去，還拋下一句：「唔係個個畀你恰㗎！」
定過神來的阿驚也開聲了：「冇事冇事冇事冇事冇事。」攤在地上的阿愁（余詠珊飾）看在眼裏，終於破涕為笑：「嗚嗚，終於唔使愁，收視有救啦！」
完
撰文：杜秋棠