由劉俊輝執導、李逸朗（Don）主演嘅電影《男極探射燈》由開拍到𠵱家認真新聞多籮籮，前幾日女主角楊子瑤接受本報訪問嗰時，開口寸黃榕搞新聞，仲擺到明話要搵佢面對面對質。
黃榕噚日以性感造型喺銅鑼灣出席美容院活動，最初佢都好開心講緊啲美容心得，點知一講到呢件事，佢即刻極速爆喊大呼委屈好傷心，黃榕喊晒口話：「有啲誤會，我話自己執三攤係戲中社工嘅角色，先係牛雜妹（李美琪）再到蔚雨芯先到我，可能嗰日訪問環境太嘈，我唔係講子瑤，我梗係知道佢係女主角啦，噚晚同佢解釋咗，希望佢明白，因為自己真係好傷心。」
有口難言
點知喺側邊嘅綠魔（Karl）忽然再爆：「今晚煞科都冇請你啦。」結果黃榕喊得仲勁，佢喊晒口再話：「唔緊要，本身劇組有聯絡我㗎，但件事發生之後就冇喇，我唔方便講太多，有口難言，自己今晚都有工作在身，好驚俾人誤會。」
撰文：馮仁昭