搞完政改大龍鳳，成個政制及內地事務局都可以輕鬆吓，局長譚志源都放大假嘞。政府噚日宣佈，譚志源噚日下午開始至8月30日離港休假，8月31日先至放完暑假返工。
本來放假就無乜特別嘅，奇就奇在政府宣佈譚志源放假期間，並無公佈署任安排，但就話期間由該局嘅資深公務員同事，負責處理局內嘅日常事務，而局長亦會同相關同事保持溝通。
雖則話原副局長劉江華升呢至民政事務局做局長後，政制局冇咗副長可以為局長頂更箒，但按照過往安排，都可以由其他政策局局長署任㗎喎，所以唔少政界中人都話呢個由政務官頂更嘅安排前所未見，唔通政制局真係冇嘢做、唔使搵人頂都得？而局長放假期間大吉利是有乜事，到底邊個孭飛？有花生友則話此舉足證譚志源人緣好，否則AO點肯捱義氣幫佢頂？