金融市場有如坐過山車，之前A股同港股股災，唔少信「阿爺萬能」論、揸重貨嘅政商界中人都損手或坐艇，佢哋以為北京暴力救市後，應該可以唞唞氣，點知又輪到人民幣忽然貶值！佢哋好多人都有投資人仔，今次真係股災傷癒、人仔插多刀！有雙重受傷嘅政界朋友同花生友講，𠵱家睇番轉頭，若然信超人李嘉誠唔信阿爺，今次或者可以蝕少啲錢！
超人狂套現唔買地
點解呢位政界中人咁講？或者好多人都唔記得，舊年中開始有報道話超人賣大陸同香港資產，引起中港市場熱議，香港有人認為超人撤資，大陸媒體亦話超人唔睇好內地經濟，仲有大陸媒體同超人計數，由2014年到今年初，超人喺內地透過轉讓資產等方式套現約738億人民幣，而且3年冇喺大陸買地，認為係用行動唔睇好內地經濟情況。
當時超人否認撤資傳聞、亦澄清唔係唔投資內地，但亦有唔少中、港孖沙借勢抽水，認為喺習近平主席領導下，中國經濟欣欣向榮，唔搭上呢班車搵大錢就笨！呢個政界中人同花生友講，當時佢都認為，北京要力撐中國經濟，又要引入外資搞活股市，「當時覺得超人今次可能睇錯，中國經濟話爆煲咁多年，幾時出過事？」但真係估唔到今次又俾超人睇啱，中國經濟真係出事，搞到要用人仔貶值撐出口、保經濟增長！
當然，正如呢個未完全服輸嘅政界中人講，其實𠵱家只係人仔貶值幾巴仙，認為北京仍有能力控制經濟唔會硬着陸。花生友問佢，之前佢哋夠話中央要股市升就唔會跌、人仔係唔會貶值，𠵱家全部唔中，咁又點保證中央今次經濟唔會硬着陸呢？
花生友
周二、四刊出