舊年10月全城目光集中係佔領運動，令到原本係10月開嘅扶貧高峯會，拖拖吓都冇人留意最後有冇開到，但𠵱家政改搞完，佔領運動又過去，今年嘅扶貧高峯會應該唔會再押後，據知暫定係10月10日雙十節舉行。
點解八方要特別講扶貧高峯會？嗱，扶貧委員會主席話就話係政務司司長林鄭月娥，但高峯會向來都係特首梁振英公佈「業績」嘅重要場合，話晒佢都係靠籠絡基層上位，特別近排盛傳佢力爭連任。據知高峯會將公佈香港去年貧窮情況，前年話有97萬人活於貧窮線下，貧窮率14.5%係近5年新低，但社福界對舊年情況唔多樂觀，認為在職貧窮仍嚴重，咁要睇CY到時有冇新對策！