可能早前攞咗太多假去外國旅遊，特首梁振英噚日牛一61歲正日生日都照返工，但去咗珠海，同市領導會面，兼去咗港珠澳大橋管理局參觀模型，了解大橋工程進展，點知珠海市委書記李嘉喺會面時（圖）主動提到大橋完工後，下一步就要研究推進兩地通關便利，壽星佬CY似乎冇諗過對方有此要求，認真係「驚喜」，因為大橋早前已敲定用「三地三檢」模式，難怪佢之後回應話要用新思維處理，冇交代點處理。
生日都返大陸，果然係「真愛國」；八方反而想知，有冇人同CY慶生，所以噚日打過電話畀新聞統籌專員馮煒光，想了解一吓CY有乜慶祝活動，但「白宮發言人」冇回覆，唔通慶祝活動太多，搞到佢好唔得閒？