政改期間因為撰文呼籲黨友有條件「袋住先」、甚至一度考慮發動聯署的民主黨前立法會議員黃成智，上月中遭中委會革除黨籍。事隔一個月，有份創立民主黨的黃成智接受《蘋果》訪問時控訴：「我覺得個黨冇人性!」
85年加入匯點、94年支持匯點與港同盟合併成民主黨，21年後卻被革走，黃成智至今忿忿不平：「篇文(撐有條件袋住先)我用咗九個字寫㗎咋，點知出咗嚟後咁大反彈？」他指撰文前，黨友羅致光與狄志遠分別提倡袋住先，最後僅他落得如此下場，「唔知係咪因為啲人覺黃成智好蝦啲、咪蝦吓佢囉？」
政界不時有傳黃成智是泛民「無間道」，「罪證」包括他在上屆區選突轉區硬撼民建聯蘇西智，結果挑機不成反失掉原有議席，黃成智稱從未聞「無間道」之說，只稱溫和取態或易惹人誤會。
對甚麼「出賣民主」等，他稱不上心，卻不滿有黨友指他take advantage of民主黨：「我咁多年來有冇怨過個黨？04年立法會泛民喺新東出鑽石名單，我讓位畀湯家驊(排第三) 我排第四輸咗；上屆蔡耀昌又出張名單出嚟新東選，大家(因為分票)一齊輸埋，我都冇怨過。」
原以為戰友會理解，溫和踏前一步或是上策，最後卻被革走，黃直指有份創立的黨走了樣：「我覺得個黨冇人性。唔係話佢哋背棄民主，而係冇咗一種感情、冇咗人情味，唔係理性面對問題。我又無得罪人，唔駛咁樣砌我吖，係咪？」
被踢走後，黨友慰問近乎零：「之後無人夠膽掂我，可能驚我撬埋佢哋走，哈哈哈。」一篇文換一個黨籍，黃成智稱無悔，現正籌組新政黨，創建中間路線：「中間派一直唔存在、一直靠邊站；但政改後見到市民對兩邊唔認同，中間派先係最大多數嘅人。」