曾幾何時，國泰航空（293）嘅服務被人讚到誇啦啦，聞說單係機上娛樂系統，佢哋就花費不菲，落本買入大量影片與電視節目，可惜近年聽到唔少朋友批評佢哋嘅服務，國泰最新一期嘅內部刊物《國泰天地》就有駕駛艙人員批評番國泰嘅機上娛樂系統唔及其他航空公司。
呢位國泰員工多次乘搭其他航空公司後，發現機上娛樂系統喺節目數量與可用性方面，都較其他航空公司落後，舉例說，人哋提供數以千百計嘅影片選擇，但國泰嘅影片數量似乎按月遞減。
國泰管理層嘅回應都幾特別，佢哋話每月都悉心搜羅不同節目，仲有大家唔係成日睇到嘅獨立電影，佢哋重視質量多過數量，唔想麻煩乘客「由於目錄過度繁複，造成選擇疲累」。原來佢哋「精選」機上節目，都係為乘客好㗎啫，認真辛苦晒。