本月係業績高峯期，除咗傳媒忙，分析員都忙到七彩，好似噚日咁，兩大科技企業騰訊（700）與阿里巴巴破天荒咁揀埋同一日公佈業績，雖然話一間喺香港上市，一間喺美國上市，但其實跟開科技股都一定會睇晒兩隻股，所以噚晚一班科技股分析員都要開OT。
咁啱得咁蹺，兩間公司都選擇晚上舉行分析員電話會議，阿里7點半開始，騰訊就8點開波，表面上兩個分析員會議並冇重叠，但兩間咁大嘅公司，分析員會議又點會半粒鐘搞掂。
華華唔少分析員老友噚晚6點幾落街食少少嘢，順便鬆一鬆，跟手7點半準時聽阿里，咁過長會否聽漏咗騰訊嘅重點㗎？老友記就話唔使擔心，反正騰訊會議初段，都係管理層講解業績，佢哋講解完，啱啱好阿里嗰邊又完晒，呢個時候打電話入去，就可以聽到問答部份。最慘只係，聽完要開夜車砌兩份報告出嚟，等今朝有功課交啫。