近日德爾斯（DSC）執笠，大批傢俬供應商同員工都徬徨無助，貨又去唔到，飯碗又不保，近月大搞網購嘅港視主席王維基噚日趁供應商代表去到電台大吐苦水時，即時致電電台，話好歡迎傢俬供應商透過HKTV Mall嘅平台銷售佢哋嘅貨品。供應商當場聽到，當堂鬆咗一口氣，收咗線再同港視主席王維基傾詳情。
唔單止吸納供應商，王維基話，相當歡迎德爾斯嘅員工過檔港視，有意者快啲聯絡港視。王維基話，因為港視網購嘅生意越做越大，貨倉大咗3、4倍，急需員工打理。王維基亦大嘆，今時今日做零售，租金佔去收入兩至三成，所以轉戰網購係出路之一喎。