喺英超第一輪，好多今季新球員都已經上陣，有啲平平無奇、有啲令人失望、亦有啲物超所值。小弟發現，幾名來自法甲嘅新兵都表現對辦，嚟緊呢季值得大家多啲留意，分別有阿休、皮耶同埋佐敦艾馬維（右）。
21歲嘅佐敦艾馬維名氣最弱。佢喺尼斯出道，上季正式上位，擔任球隊左閘，佢嘅防守數據可說冠絕法甲，同埋佢彈跳力唔錯，頭槌亦可以。小弟仲以為佢今季會跳去豪門，點知俾阿士東維拉執到寶。第一場波，佐敦艾馬維就繼續佢防守數據王嘅風格，五次成功埋身搶截，五次攔截到對手傳球，成為維拉後防嘅定海神針。
踢進攻中場嘅阿休就大名得多，喺法甲打滾好多年，係加納國腳，今夏同馬賽約滿後，跳槽到史雲斯。阿休喺「天鵝軍」踢右翼，侵略性好強，經常闖入禁區，對車路士場波就射入一球。上星期，小弟介紹韋斯咸，都有提過皮耶呢位上季法甲助攻王，佢即刻做到嘢，助攻高耶迪入波。呢三名法甲兵都係有料之人，但轉會費唔算好高，免費嘅阿休固然抵到爛，佐敦艾馬維值900萬鎊，皮耶就使咗槌仔幫1,070萬鎊。喺現今轉會費郁啲就過千萬鎊嘅球壇，佢哋嘅性價比真係一流。
文：咖喱