喺大台劇《巾幗梟雄之義海豪情》演宮崎隊長嘅楊證樺，由於劇中有好表現，獲李添勝大讚，喺無綫捱咗十幾年，總算捱出頭。而楊證樺亦已步入人生另一階段，同無綫女藝員沈可欣拉埋天窗，兩人喺圈中人緣幾好，出席嘉賓包括袁偉豪、黃建東、唐詩詠、林淑敏等都有到賀，而袁偉豪亦喺微博送上祝福：「恭喜你們快生小孩啊！」