人生有幾多個十年？多年來都予人美女形象的劉心悠，上年自組工作室做老闆捧自己，挑戰講性事電影，兼首次醜化自己演白面女鬼，今年則再一次挑戰鬼片，做無頭女鬼，嚇人之餘，不再框框限制自己走美女路線。今年踏入演藝圈第十個年頭的心悠，講明對自己越來越有要求，「𠵱家有啲嘢係有所謂，好清楚知道自己能力，邊方面做唔到，又或者邊方面想嘗試，所以一路tune緊。」
統籌：林妙萍
撰文、造型：陳蔚渝
攝影 ：周樂恆
化妝：Jan Chan of Annie G.
髮型： Eris Chow of Xenter
水晶 ：Swarovski World Jewelry Facets 2015
劉心悠今年再一次拍鬼片，在新戲《有客到》內演繹一名因為在新婚當晚遇上意外，而失去頭顱的女鬼，因為劇情關係，需要到殯儀館取景拍攝，更要事前做足心理輔導，不過仍然經常唔小心被自己一頸血淋淋的妝容嚇親自己，「其實係我嚇人而唔係人嚇我，自己好多時候唔記得咗，去洗手間望鏡會突然之間嚇一跳，因為都幾驚。」
演繹女鬼難抽離
心悠與蔡瀚億（BabyJohn）結緣第一次合作，在《有客到》演繹一段青梅竹馬，因誤會而分開的人鬼戀，但由於太過投入，情緒至今仍未完全抽離，「因為好多時候係我見到佢，佢見唔到我， 情緒大部份都係要喊，好沉重，情景大部份都係殯儀館，一啲冷冰冰嘅地方，所以見到佢會有啲好沉重嘅感覺，even到𠵱家。不過佢係一個好想合作嘅對象，只不過今次套戲，我哋拍戲時冇乜機會傾偈，又或者講笑，對我嚟講，佢係一個好認真嘅演員，大家都好認真去做好每一個鏡頭。」雖然已經有兩次拍鬼片的經驗，不過心悠卻自言害怕單獨看鬼片，「要人陪，自己就又想睇但又好驚。」
除了鬼片，心悠表示仍有很多不同類型的電影想嘗試，「例如一些冷背景嘅戲，打戲、戰爭片，又或者歷史人物，我都好期待同憧憬去嘗試。一直希望每個project都係充滿新鮮感，只要劇本有發揮，無論同邊個合作我都冇所謂。」
拒絕框住自己
心悠今年踏入演藝圈第十個年頭，人生與演戲經驗多了，自然對自己的要求也提高，「其實一路都係tune緊自己嘅諗法，因為我𠵱家嘅mindset冇可能去到十年之前，我乜都唔識，乜都冇所謂，𠵱家嘅我好清楚知道自己能力。演戲方面，主要想focus一啲我未做過，我想挑戰嘅point去行。」
上年心悠更開設了工作室做老闆，不過心態上卻沒有大改變，反而是希望為自己製造更多可能性，「我嘅mindset係唔想框住呢間公司一定要去做啲咩，只不過係呢間公司確實soften同widen咗我想做嘅嘢，譬如有好多嘢我可以主動咗，去同人傾唔同嘅project，好多人問我會唔會簽人，都係呢間公司畀我嘅possibility。如果時間OK，我都好想可以同唔同嘅crew合作，上年簽咗畀吳奇隆間公司，有crossover合作，嚟緊應該會有多啲project喺內地。」
結婚生B零感覺
最近圈中女星、歌手及名模的喜事一單接一單，踏入適婚年齡的心悠卻表示依然工作至上，對於結婚生BB更是毫無感覺，「完全冇感覺！只係最近因為啲人結婚、生仔畀咗幾封利是，開始買禮物時要諗吓BB鍾意啲咩，BB想食啲咩。」對於生BB，心悠表示還未到合適時候，「就好似好多人會問我點解唔養寵物，其實我都好想，但如果我知道佢會因為我而唔幸福，咁就算喇。我主要係工作行先，淨番嘅時間當然係畀屋企人，同我會偷時間去旅行，係好難balance，就係要即時行樂，你話係咪咁講？」
十年渣馬承諾
提起劉心悠，不期然會令人想起渣打馬拉松 ，已經連續參加了九次渣馬10K賽事的心悠，難免令人有興趣想知道她會否挑戰半馬，又或者全馬，「呢個係後一年嘅事，因為出年都要完成一個自己畀自己嘅promise，跑第十次，想嘗試有可能再跑多啲。」最初跑步，原來心悠只是因為同事隨口問問，「最初唔知道係乜，報咗名先知道原來係要練跑嘅，之前冇概念，練跑嘅過程就鍾意咗跑步，第一次馬拉松就覺得好過癮，幾乎全香港嘅人都喺嗰條橋上面嗌，我覺得好特別，就係第一次開始我就同自己講，『好!我要跑十次!』」
更多精采時尚內容，盡在 http://add.appledaily.com 。