葉蘊儀（Gloria）近年專心藝術工作為主，久唔久客串電視劇同電影，日常生活大多同圈外人嘅生活無異。前晚佢就同女性朋友喺銅鑼灣利舞臺一間大眾化成衣店Cotton On揀衫，佢戴上黑框眼鏡兼草帽打扮，喺舖入面專攻瑜伽衫褲，當中佢揀咗彩格圖案嘅運動bra、瑜伽褲、背心同瑜伽蓆，估計佢應該啱啱接觸瑜伽，由頭到腳嘅裝備都要一次過入貨，兩人各自畀完錢就離開成衣店。
買餸煮飯
之後Gloria行到附近街市買餸，佢先後幫襯魚檔、蔬菜同水果，買完餸就坐的士走人，應該都係返屋企煮晚飯。其實Gloria相當關心時事，不時為公義發聲，舊年就用黃絲帶撐學生運動。上個月尾就因「胸」出事，皆因佢就吳麗英喺今年3月「光復元朗」，反水客行動中爆發警民衝突，被判以胸襲警及阻差辦公罪成，在fb發起一人一相行動，反對女性胸部被視為攻擊性武器，抗議以法理之名胡亂定義女性身體。當時Gloria接受本報訪問時，更列舉古今過往胸部都係有餵哺功能，更呼籲女性團體為吳麗英發聲，佢嘅fb更被持相反意見網民留言洗版狂鬧。
撰文：馮仁昭
