車路士門將泰拔高圖爾斯上場聯賽領紅被逐，上訴失敗而要停賽一場，下周日作客曼城場大戰就冇份打，但係相信佢都會好唔得閒嘞，皆因英國《太陽報》踢爆，佢上年五月背住女友Marta Dominquez偷食；雖然𠵱家已經告一段落，但要𠱁番早幾個月先幫佢生咗個女嘅Marta，睇嚟都有排搞。
據講高圖爾斯上年喺選美比賽睇中咗模特兒Emily Vanhoutte，之後喺fb展開追求攻勢，「好儍好天真」嘅Emily以為對方真係單身，所以就同高圖爾斯開始咗。心水清嘅花生友都會記得，高圖爾斯早兩年畀過頂綠帽佢位比利時國家隊隊友奇雲迪布尼戴；加埋今次，有人就話佢係「可造之材」，絕對有能力做泰利接班人，成為車仔下一任隊長喎。
靚女軍醫fb多謝粉絲
車仔嘅靚女軍醫伊娃都有玩fb，但用途就正當得多。上場波俾領隊摩連奴鬧爆後，上咗fb多謝公眾撐佢（右圖），可惜據報摩佬太小器，球會已經下令，以後訓練同比賽，伊娃都唔可以出席。