官場奶媽政務司司長林鄭月娥雖然好打得箒，但一樣會有甩轆時㗎喎！噚日佢去到烏溪沙青年新村，探訪少年警訊滅罪夏令營嘅營友，其間仲到攤位「大顯身手」，攞起支玩具軟彈槍試玩。
八方現場所見，揸槍林鄭好認真，瞇晒眼、紮行馬，有晒姿勢瞄準遠距離嘅「毒品」道具。點知，第一槍，落空咗；唔緊要，再嚟第二槍，噢，依舊中空寶，連發兩槍都唔中。
賴個架set得低
可能見到啲年輕人營友，心境都會young啲，林鄭即時變身小朋友，輸咗玩賴賬，笑稱有人喺後面阻到佢、又話個架set低咗，見到萬能司長咁「風趣」，喺佢身邊嘅保安局常任秘書長羅智光同新一哥盧偉聰，笑到見牙唔見眼。
但不過林鄭之後玩水槍時，卻一擊即中穿過一個細窿，啲水仲直接射正企喺窿後嘅攝影大佬，莫非佢睇錯嗰位攝記係一男子？