昨日《4個小生去旅行》舉行記招，點知突然發生謝賢打曾江事件...
其實《4個小生》入面嘅4個小生，仲有默默坐咗喺左邊嘅Joe Junior，佢喺上一集《3個小生去旅行》時，鋒頭已經成日都俾謝賢同修哥搶晒之餘，好似仲要成日執頭執尾咁款。
昨日呢個記招，胡楓(修哥)夾住謝賢同曾江中間，Joe Junior就坐咗喺最左邊，曾江同謝賢對話火藥味勁濃期間，因為修哥坐在中間做磨心，佢一直都係挺直條腰唸唸有詞講:「唔好嘈啦...唔好嘈啦...」而Joe Junior其實一開始訪問時，已幫晒3個人拎晒所有記者嘅錄音咪，好似記者一樣，直至四哥出掌，修哥誤中飛甩眼鏡，但之後仍然擋住兩人，怕氣氛再差落去，而Joe Junior就繼續好盡責咁坐咗喺左邊拎住錄音咪，仲伸手遞向謝賢等人，等記者嘅錄音咪收音好啲。