人民幣突然大幅貶值，市場最關注，人民銀行行長周小川幾時出來講嘢。周小川曾主持2005年滙改，令人民幣大幅升值，為佢贏來人民幣先生稱號。佢威水史多籮籮，是首位有博士學位，並且為任期最長的人行行長。最威喺2009年金融海嘯時，佢發表文章話要成立新國際儲備貨幣，要廢除美國佬美元武功，威震全球，入圍當年《時代》人物榜。
不過，周小川近年已風光不再。2012年中共十八大選舉，佢失去中央委員席位，黨內地位大幅下降，甚至不如能晉升中央委員的中證監主席肖鋼。
有消息話，周小川一直反對人民幣滙率變動過急，會影響人民幣國際化。今日外電報道，今次人民幣貶值係商務部推動，想刺激出口。商務部部長高虎城係中央委員，政治地位遠高過周小川，結果人行終於都頂唔住要投降。
黃尹華