牽牛有要事，小弟代筆。提起法國，小弟嘅第一印象係浪漫，同講求刺激嘅英超幾大落差，最怕有啲花拳繡腿嘅法甲勁人嚟到水土不服。講到底，有咩浪漫得過再續未了緣？主角係由法甲聖伊天以700萬鎊轉投般尼茅夫嘅麥斯格拉度（圖）。
維拉唔使3,000萬鎊買到四位法甲兵，賣走賓迪基筆錢仲有剩，難怪英超中型班都想喺法甲尋寶。睇番上年轉投英超嘅法甲兵，筍貨有奧斯賓拿同迪亞法沙高，水貨亦有紐卡素嘅雷米卡比拿同利維亞尼：明明係蒙彼利埃指揮官同摩納哥射手，單季入咗24球，嚟到英超成季入得兩球，𠵱家仲傷晒，真係有辣有唔辣。
講番格拉度，上季由記者票選嘅法甲最佳陣容，前鋒有佢同里昂嘅拿卡錫迪。呢位27歲科特迪瓦翼鋒上季幫聖伊天入17球，平均87分鐘𡁻一粒；佢17歲已經簽約李斯特城，07/08球季外借過般茅一年，應該慣晒英倫節奏。今次再續前緣，格拉度首戰入替廿幾分鐘，七次傳球全部成功兼被侵犯兩次；小弟最鍾意佢呢句：「我收到更大球會嘅更豐厚出價，但你要前往自己過得快樂嘅地方。」衷心希望般尼茅夫季尾護級成功，球迷同佢講一句Je T'aime （法文：我愛你），就係最浪漫落幕。
文：華素爾