尹佩斯同拿尼諗住離開英超勁旅曼聯，轉投土耳其球隊費倫巴治就有好日子，點知原來係跌落另一個地獄先真。日前佢哋兩個嘅新隊友美密特托普練完波揸車返屋企途中俾個槍手伏擊，好彩美密特托普揸嗰架係防彈車先避過一劫；尹佩斯同拿尼眼見土耳其咁危險，睇嚟除咗出入要坐防彈車之餘，平時練波甚至比賽都可能要着避彈衣。
隊友駕防彈車避一劫
29歲嘅土耳其國腳中場美密特托普周二喺練習場同尹佩斯、拿尼等隊友練完波，揸車返屋企途中俾個蒙面人開槍射，好彩佢架平治G class係防彈嘅，佢同埋坐佢順風車嘅20歲小將烏加美特施碧克先至冇受傷，但佢前面塊擋風玻璃就留低好大個子彈窿。費倫巴治之後發聲明表示：「今次好明顯係恐怖襲擊。我哋強烈譴責呢種行為，同時希望有關當局可以盡快拉到行兇者，令佢受到法律制裁。」費倫巴治亦表示美密特托普應該冇同人結怨，所以唔知槍手嘅行兇動機。
四月槍擊案曾暫停聯賽
今次唔係費倫首次牽涉入槍擊事件，今年四月四日，佢哋踢完作客對基古爾場土超，隊巴喺去機場途中遭槍擊；而司機喺事件中中槍受傷送院，但就冇球員受傷。事後土耳其所有足球比賽亦暫停一周。對於費倫巴治再成槍手針對目標，土耳其足總表示非常震驚：「今次槍擊事件唔係淨係土耳其國腳同土耳其國家隊嘅事，亦同土耳其足球有關。」
費倫喺五個月內有兩單槍擊事件，睇怕今夏由曼聯齊齊過檔嘅前鋒尹佩斯同翼鋒拿尼，家陣肯定嚇到面都青埋。嚟踢波搞到條命仔隨時都冇埋，若然有得選擇走人，我求大俠深信佢哋肯定想盡快離開土耳其；如果要硬着頭皮繼續留喺土超比賽，佢哋就要嗱嗱臨去買防彈車同埋避彈衣，之後再去請教喺踢咗加拉塔沙雷兩年半嘅荷蘭中場史奈達，問吓佢點先可以喺土耳其安全生活喇！
