鄺美雲（Cally）與恒地（012）樓神林達民今年初結束3年情，但原來Cally喺2012年9月跟樓神蜜運冇耐，動用過千萬元支持男友，向恒地購入馬鞍山迎海一個單位。咁啱得咁蹺，林達民負責銷售嘅最新一期迎海．駿岸開售前夕，Cally就趁高位沽貨，賺超過200萬元。
地產代理爆料，Cally持有嘅迎海1期2座中層F室單位，實用面積914方呎，近日以1,330萬元易手，呎價高達1.45萬元，創埋屋苑二手呎價新高。
Cally透過公司持有呢個單位，公司董事有兩人，一位係Cally，另一個並非林達民，而係鄭彭金玉，佢哋2012年以1,125.8萬元購入，仲毋須按揭以現金入市。
林達民噚日出席迎海．駿岸記者會時，自然被追問Cally賣樓一事，但佢一概不回應，絕口不提舊愛嘅事。