辦大事嘅時候冇廁紙用，真係人生灰到極嘅時刻之一。《蘋果》噚日報道，未定罪被還柙於懲教署嘅人士，每日只係得8格廁紙用，男士可能勉強夠用，女士就完全唔夠用囉。
懲教署今日同八方澄清，實情所有在囚人士、包括還柙人士在內，第一日入懲教院所都會獲發一卷廁紙㗎，之後男犯人每3個星期就有一卷廁紙，女犯人就每個月有兩卷廁紙，而且有需要嘅話，犯人可以問懲教署職員攞，職員會按需要派發。
八方上網查過，一卷廁紙到底有幾多格，數目由接近200到幾百格都有；如果以最保守嘅一卷200格去計，男犯人每21日有一卷，即係平均每日有近10格，都好似唔係好夠喎。