白鴿黨近期除咗驗鉛水同反圍標打響個朵，嚟緊仲好事多籮籮，黨內多名年輕成員都即將拉埋天窗。其中身為中委嘅組織部部長蔡雨龍會喺今年10月成家立室，南區區議員區諾軒就明年2月變老襯，司庫袁海文明年9月亦會喺海外結婚。而已故民主派三料議員吳明欽個女、現職大律師嘅吳思諾亦有喜訊傳出，據悉佢同民主黨大律師譚俊杰今年6月喺希臘訂婚後，決定明年10月出閣做個靚新娘。思諾成為大狀後，早前仲有份幫民主黨中西區區議員許智𥧌，打甩因為抗議區議會黑箱作業期間俾警方控告普通襲擊罪一案。一向同思諾熟絡嘅何俊仁話，知道思諾計劃結婚，話啱啱先幫思諾細佬證完婚，佢知道思諾就嚟結婚都好開心。