八方噚日收到政府新聞處一篇新聞稿，推介港台文化合作委員會嘅年度港台文化交流盛事──「香港週2015@台北」。呢個活動9月10日至10月11日喺台北舉行，以「繼往開來．活在當下」為主題。
展覽中，有個名為《在「一樣的月光」下「明日話今天」》嘅大型裝置，由林嵐合作社創作。咦，點解咁熟口面嘅？原來作品利用雨傘運動嘅主題工具，講述「遮日擋雨的傘布，縫合成串聯港台兩地、護蔭民眾的一大片藍色天空」。作者話今日香港、明日台灣，目前從大陸形成嘅政治新氣候，究竟為香港同台灣人將來嘅生活帶來乜影響？值得思考
反思圖像化新聞報道
另一個由黃照達創作嘅錄像裝置《什麼新聞台》，就重提無綫記者潘蔚林喺颱風莫拉菲襲港期間做直播嘅經典場面，佢之後仲獲MJ潘之名。作者話，每日社會發生嘅事情被賦予嘅意義，完全取決於媒體嘅報道方式。當資訊過份應用影音化、圖像化、即時化、甚至透過動漫手法來傳達與描述時，人否可唔可以保有自主思考？