政圈一直流傳內地以至港區省市政協呢啲超級花瓶位，只要出得起錢就有計，有騙徒似乎以呢個「傳聞」嚟捉心理，現為安徽省政協委員嘅民建聯立法會議員陳恒鑌Ben自爆，早前有自稱安徽省政協秘書長打電話畀佢，暗示只要科水就可以升呢做常委，阿Ben覺得唔對路，故意叫對方send張卡片嚟睇睇，自誇以精靈擊退騙徒，唔通想證明建制派唔係豬一樣隊友？
近來假冒內地機構或官員嘅電話騙案不斷增加，但原來阿Ben早喺4月時已經收過類似電話。佢同八方講，當日有自稱安徽省政協秘書長嘅人打畀佢，話想將佢升呢做常委，點知對方越講越唔對路，暗示最近用錢用多咗，問佢可唔可以幫手。
騙徒似做過資料搜集
嘩，一聽到同錢銀有關，阿Ben心知不妙，加上佢做緊第二屆安徽省政協嘞，但呢位「秘書長」都冇同佢聯絡過喎，聽落肯定有景轟，所以未等佢開價，已經專登叫對方send張卡片嚟，最後梗係冇再聯絡啦。
阿Ben話喎，相信騙徒曾經做資料搜集，針對性進行詐騙，但佢覺得如果要升職，應該靠實質貢獻而唔係講金囉，同埋點會打個電話咁兒戲？佢仲自稱「我個人比較唔貪心」，就係因此避過一劫？原來近日佢都收過關於速遞公司騙案嘅電話，當然係冇上當，但就冇人扮中聯辦嚟呃佢喎，唔知西環呢個朵，對阿Ben嚟講嘅震懾力會唔會多好多？
李八方
mailto:[email protected]