歐洲主要足球聯賽陸續開鑼，本來又係各路球迷推晒周末大小約會，坐定定睇直播嘅日子……不過，隨住now TV噚日宣佈再度攞到西甲未來三季嘅香港獨家播映權，裝緊有線嘅波友，周末夜晚可能要另外搵節目啦。
德甲開鑼播映權未落實
自從近年「外國勢力」beIN Sports同Fox Sports先後染指各大聯賽嘅亞洲區播映權，個餅唔再單純由本地電視台瓜分（見附表）；例如落戶now嘅Fox今季擸咗德甲同歐霸盃嘅亞太區播映權，不過，香港區份點播法仍有變數，因為Fox原來仲未同now傾掂數，所以唔排除Fox將德甲嘅香港播映權再放出嚟同其他台合作。
據我求大俠八到，有線諗住同now拗手瓜爭西甲，以免周末夜晚冇晒歐洲主要聯賽睇；點知最後都係now同賽會傾掂數，再度攞到西甲未來三季嘅香港獨家播映權至2017/18球季，今季西甲喺香港時間8月22號深夜兩點半開打，揭幕戰係馬拉加迎戰西維爾。至於未落實嘅意甲，據講落戶TVB收費台嘅beIN同賽會斟緊，繼續播嘅呼聲好高。
網民跪求推平價歐聯plan
睇番成個配套，now用家周末夜晚有英超同西甲睇，周中亦可能有歐霸盃；至於有線播緊嘅日聯同澳職主要喺下晝到黃昏開波，歐聯就係周中深夜波，嚟緊周末夜晚或者要餓吓波啦。得知now保住西甲，香討就有唔少cut台呼聲，亦有網民慨嘆有線唔爭氣：「冇NBA轉播CBA，冇英超播澳職，冇德甲播日聯，冇四大聯賽播國冠盃……睇嚟播中超機會率又大增。」
不過，多波播係好事，播唔播得晒係另一回事。我求大俠噚日睇番Fox官網暫定嘅香港區時間表，都仲未公佈周六開鑼嘅德甲賽程；另外，有網民不滿now播西甲場次太少，又講番之前東錦賽出現過冇廣東話評述嘅情況……講到尾月費先係最關鍵，有網民跪求有線推出平價歐聯高清plan，有人仲FF有線下季搶番今季到期嘅英超播映權㖭。