長和（001）旗下屈臣氏喺香港開旗艦店，老闆「小超人」李澤鉅剪綵完畢，當然都要幫襯番些少，做開幕後第一名顧客喇。佢冇兩頭騰搵嘢買，職員自動波遞咗兩個膠樽畀佢，小超人即刻「唔該」前、「唔該」後，叫員工將貨品放入袋，再簽卡，十分之客氣。李澤鉅到底買咗乜東東呢？原來係旗下長江生命（775）推出嘅「楓之寶」保健產品，一樽係護心嘅「強心奧米加3」深海魚油丸，而另一樽就係養眼嘅「健目藍莓」丸。產品做緊八五折，折實之後，加埋盛惠278.8元，發個發，都係意頭嘢喇！