特首梁振英接受新華社訪問時重提放棄過時嘅積極不干預思維，唔少人質疑佢係咪想明目張膽干預市場？咁啱得咁蹺，同CY唔啱key嘅自由黨榮譽主席田北俊噚日喺facebook話喎，日前應資生堂邀請，為奧比斯慈善籌款拍攝，影到中段，靚女攝影師叫佢睇吓啲相畀意見，但佢堅持唔睇，因為攝影師係專業，繼而話嘞：「做領袖如果乜都理，隨時搞到一鑊粥，但𠵱家特區就有D（啲）人唔明呢個道理，哈哈！」
老婆投訴唔緊張公司
田少想寸邊個？大家心中有數。其實當日影相時，田少明言眼中最珍貴、最希望守護嘅就係香港人嘅自由，其間仲將一幅象徵自由嘅飛鳥相拋向鏡頭，高叫「自由」！
田少笑稱基於政治正確，除咗自由同自由黨，家庭都係佢最要守護嘅嘢，自爆田太投訴佢緊張自由黨多過公司。田少解畫，指自由黨好多時冇咗佢就唔掂、公司同屋企事務太太同仔女都打理得好好喎。