邊個咁大面子，居然可以令北韓最高領導人金正恩親自去機場接機？之唔係喺中國贏咗女子東亞錦標賽嘅北韓女子國家足球隊囉。北韓女足喺上周六最後一輪分組賽贏南韓2:0，以三戰全勝嘅成績成功衞冕，金正恩隨即公開讚佢哋為國爭光。日前北韓女足凱旋，金正恩就帶埋太太李雪主，親自去平壤順安機場接呢班英雌。金正恩以招牌造型登場，加埋副黑超，望落成個韓星咁；而佢仲同披住北韓國旗嘅球員逐一握手，唔知係咪有機會與國家最高領導人同偶像零距離接觸，有啲球員表現得好激動，仲忍唔住喊咗出嚟。呢班女子球員幫北韓揚威國際，同金正恩握完手之後，我求大俠就深信，金正恩肯定重重有賞。