曼城喺周一英超守尾門登場，靠耶耶托尼梅開二度，加埋高柏尼接應角球用膊頭撞入，作客清風送爽大炒西布朗3:0，可以過番一個禮拜榜首癮。呢場波嘅焦點，當然落喺身價4,900萬鎊嘅史達寧身上；佢今場被安排踢左翼，除咗一兩次精采盤扭之外唔算好突出，其中40分鐘有球單刀黃金機會熨得太正，俾對方門將邁希爾撲出，下半場一記窄位施射亦無功而還，最終喺74分鐘由拿斯尼入替。雖然史達寧嘅埋門一腳仲要苦練吓，但冧粉絲嘅功力就超晒班，佢賽後唔理保安勸阻跳過廣告牌，將件七號波衫送畀觀眾席上兩位曼城小粉絲，𠱁得兩位妹妹笑晒口，仲換嚟作客球迷高歌一曲：「史達寧，佢係聯賽最勁。」領隊比歷連尼賽後話：「我唔會覺得失望，因為佢踢咗70幾分鐘好波。」