A股6月、7月暴跌之謎終於解開！原來喺5月底，以活熊取膽出名的福建民企歸真堂，有15隻被豢養的小黑熊出逃，當地捉咗兩個月，至今仲有4隻熊仔尚未緝拿歸案，周圍遊蕩。呢兩個月有熊出沒，難怪A股一直救極唔起。
歸真堂喺A股非常出名，該公司將黑熊困在籠中，將導管直接插入熊膽，抽取膽汁製藥，畫面極度殘忍。公司喺2012年2月申請上市，擬集資飼養更多黑熊，已經獲得中證監初步批准，但因各方抗議，最終擱置上市。當時環保組織與歸真堂日日激辯，有關黑熊的新聞不斷出現財經版，結果A股真的變成熊市。
事實證明，凡係有歸真堂新聞出現，A股一定冇好結果。對於仲逃亡緊的4隻熊仔，內地股民心情亦好矛盾，有人話，「小熊，你快快逃，不要被捉回去取膽。」但亦有人希望，公安盡快捉番佢哋，否則股市又再變熊市，就大大不妙。
黃尹華