第5批iBond（4228）噚日首日掛牌，即日沽嘅話，按收市價計，一手賬面賺550蚊。耀才證券（1428）市務總監郭思治（郭sir）抽中兩手，佢噚日朝早出席完耀才股東會就沽貨，拎成千蚊同老婆、阿女食餐好嘅。
郭sir話，「（沽iBond）賺到嘅錢要即刻同太太、阿女出去食飯、消費，等個市面好番啲，刺激吓個經濟，唔好話我賺晒」，仲話去到邊食到邊，冇乜所謂。可惜郭太與郭小姐都冇抽iBond，否則佢哋應該可以再食豪啲。
其實郭sir要刺激經濟，沽iBond都係碎料，耀才舊年年報披露，郭sir年薪198.5萬元，除開12個月等於月薪16.5萬蚊，都未計郭sir自己投資獲利呢。