雖然盛傳係特首梁振英叮走嘅人選之一，但商務及經濟發展局局長蘇錦樑Greg似乎冇因此影響心情，繼續外訪推銷香港，噚日佢就到咗澳洲墨爾本，仲喺澳洲經濟發展委員會午餐會上猛sell一帶一路嘅商機，話喺呢個國家策略下，外國投資者在港開業勢必受惠，今次呢番說話肯定啱晒CY合尺。
除咗宣傳一帶一路外，阿Greg此行都觸及自己嗰瓣，佢同時到訪維多利亞州一個共用工作空間、以及一個專門支援初創企業生態系統嘅非牟利組織，了解當地初創企業環境，兼同維多利亞州小型企業、創新和貿易部長Philip Dalidakis會面，交流吓商貿意見。