農曆七月就到，搞開盂蘭勝會嘅潮屬社團總會話，而家過盂蘭節，都要諗計吸引後生仔，唔想傳統失傳。想喺鬼節吸客唔係咁易，總會今年搞咗個盂蘭文化節，本月26至28號喺觀塘康寧道遊樂場舉行，仲會喺27號、即係農曆七月十四「正日」，搞個熱鬧過長洲搶包山嘅「搶孤」比賽。講起「搶孤」八方都一頭霧水，總會會董胡炎松話即係搶孤魂野鬼祭品咁解，但唔係叫人同鬼搶食，係等所有拜神儀式做完後，將祭品分畀人嘅環節。佢話香港一早優化咗搶孤環節，直接派平安米，今年米會繼續派，但想有番啲睇頭，加多個表演性質嘅搶孤。搶孤比賽有18隊參加，參賽隊伍要用長約2.5米嘅漏斗形孤承（即係竹簍），鬥搶得多迷你平安米包，冠軍隊伍會獲5,000蚊獎金。