做老闆，要有良心還是無良心？有良心老闆會賺唔到錢，真正無商不奸嘅無良心老闆可以發大達？
其實做生意有良心固然好，但做生意要能夠生存、賺錢，其實與良心冇乜關係，最重要嘅係尊重市場規則，唔好以為自己最聰明、無堅不摧。借用佛利民一句名言，企業的唯一社會責任就係在制約條件下賺錢，做生意賺唔到錢，讓生意倒閉，遣散員工，或甚至一走了之，置員工於不顧，就係無良心僱主，理得你平時對員工好唔好吖。
DSC德爾斯本是平價直銷商，靠樓上舖起家，去貨靠平取勝，發財之後，漸漸忘記自己嘅優勢所在（樓上舖慳租金），以為自己做生意好叻，猛咁開分店，租人流旺商場嘅店舖，於是固定成本升，員工成本升，租金升，一到市道逆轉，零售業萎縮，自不然就周轉不靈，老闆許明順不止將DSC拉閘關門，自己一家人都自喇沙利道豪宅搬走，一去無蹤，海關、警察、勞工處、都要搵佢問話。做老闆做成咁，有良還是無良？
另一位近日備受財困干擾營運，創辦人兩兄弟因而意見不和，鬧上公堂嘅就係西雅圖著名良心僱主Dan Price嘅公司Gravity Payment。今年四月，Price宣佈自己減薪93%，將全體員工工資提升至每年7萬美元，為改善美國社會收入分佈不公，盡一分綿力。消息公佈後，Price成為美國英雄咁滯，當時左丁山對老友講，在資本主義社會搞大鑊飯，違反多勞多得及美國社會嗰套能者居之嘅哲學，Price之舉會有後遺症。哈，未夠四個月，市場經濟嘅理論預測能力逐漸得到證實：（一）Gravity Payment嘅叻員工不忿，開始離職，（二）打咭上班冇貢獻嘅員工也有7萬年薪，冇人肯再搏命，（三）一啲客戶覺得Price嘅政策太過政治性，會導致服務水平下降，不如幫襯過第二間，（四）亦有新客戶加盟，但多幾個客戶就點都要增加若干人手，位位7萬年薪，成本實在太高，長此以往，公司一定虧大本。此外，Price嘅阿哥反對高薪大鑊飯，認為細佬傷害股東利益，濫用公司資產，告上法庭。唉吔，講良心，Price冇得彈，但論到做生意，佢實在太過天真，會令Gravity Payment難以在成本上與同行競爭，遲早執笠。無良僱主睇唔清市場趨勢，盲目擴充，有良心僱主盲目跟隨個人理想，不理市場競爭之現實，得到同樣結果，就係累親本來唔錯嘅公司。做老闆最緊要唔係講有良定無良，而係看清楚及尊重市場理論及趨勢。